వైఎస్‌ దేముంది
ఉంటే రాజ్‌భవన్‌లో ఉండేవాడిని
కేవీపీ నాకు ద్రోహం చేశారు
ఉప ఎన్నికల్లో పోటీ చేయకుంటే మంచిది
అధిష్ఠానం ఏమంత బలంగా లేదు: ఎమ్మెస్‌
హైదరాబాద్‌ – న్యూస్‌టుడేకాంగ్రెస్‌ సీనియర్‌ నేత

        ఎం.సత్యనారాయణరావు మరోసారి సంచలనం సృష్టించారు. ప్రత్యేక తెలంగాణకు కాంగ్రెస్‌ అధిష్ఠానమే అడ్డని ప్రకటించారు. ముఖ్యమంత్రి వై.ఎస్‌.రాజశేఖరరెడ్డి మనోభావాలతో సంబంధం లేకుండా… అధిష్ఠానం ఇవ్వదల్చుకుంటే తెలంగాణను ఇచ్చేయొచ్చని అన్నారు. ముఖ్యమంత్రి సన్నిహితుడు కేవీపీ తనకు ద్రోహం చేశారని వ్యాఖ్యానించారు. వైఎస్‌కు తానిచ్చినంతటి మద్దతును ఎవరూ ఇవ్వలేదని, దీనికోసం తాను ఇతర కాంగ్రెస్‌ సీనియర్ల నుంచి ఇబ్బందులెదుర్కొన్నానని ఆవేదన చెందారు. శాసనసభ లాబీల్లో ఎమ్మెస్‌ విలేకరులతో మాట్లాడారు. విలేకరుల ప్రశ్నలు… ఎమ్మెస్‌ స్పందనలూ…

తెలంగాణపై కాంగ్రెస్‌లో ఏం జరుగుతోంది?
               జరిగేదేముంది? ప్రధాని మన్మోహన్‌ ఎప్పుడో చెప్పారు… ముఖ్యమంత్రి వైఎస్‌ అంగీకరించటం లేదని! బలమైన ముఖ్యమంత్రిని కాదని తెలంగాణ ఎలా ఇస్తారు?

అంటే ముఖ్యమంత్రే అడ్డుగా ఉన్నారా?
            ఆయన తెలంగాణకు అంగీకరించకపోవటం అలా ఉంచండి. కాంగ్రెస్‌ అధిష్ఠానం ఇవ్వదల్చుకున్న పక్షంలో వై.ఎస్‌. ఆపలేక పోవచ్చు. తల్చుకుంటే వెంటనే రాష్ట్రాన్ని ఇచ్చేయవచ్చు.

అధిష్ఠానానికే తెలంగాణ ఇష్టం లేదనా?
              మీరు కూడా ఢిల్లీ కోణంలో ఆలోచించండి. ఇప్పుడు యూపీఏ ప్రభుత్వంలో ఒక్క కాంగ్రెస్‌ మాటే చెల్లుబాటు అవుతున్నదా? అది నానాజాతులున్న కూటమి. అందరూ కలసివస్తేనే ఉమ్మడి నిర్ణయం చేస్తారు.

రాష్ట్ర విభజన జరిగితే సీట్లురావా?
            ఇప్పుడున్న ఫలితాలు పునరావృతం కావేమోనన్న అనుమానాలున్నాయి. పార్టీ అన్నాక అన్నీ ఆలోచన చేయాలి కదా! సోనియా స్థానంలో ఎవరున్నా ఇలాగే ఆలోచిస్తారు.

ఉప ఎన్నికల్లో కాంగ్రెస్‌ పరిస్థితేంటి? 
                అవి తెరాస సీట్లు. మేం కలసి పోటీచేశాం. ఇప్పుడు వారి సీట్లకు వారి రాజీనామాల కారణంగానే ఉప ఎన్నికలొస్తున్నాయి. ఆ సీట్లలో కాంగ్రెస్‌ పార్టీ పోటీ పెట్టకుండా ఉండటం సమంజసం. ఇది నా అభిప్రాయం. దీన్ని కొందరు మంత్రులకు చెప్పా. అవసరమైతే పార్టీకి చెపుతా. నన్నడిగిన పక్షంలో ముఖ్యమంత్రికీ చెపుతా.

కాంగ్రెస్‌ పోటీచేస్తే…?
               చేస్తేఏమవుతుంది? కరీంనగర్‌లో ఏం జరిగిందో తెల్సుగా! అభివృద్ధి ఎంత చేసినా సెంటిమెంటుముందు నిలబడదు. అలాగని మేం తెరాసకు పనిచేయం. కాంగ్రెస్‌ కోసమే పనిచేస్తాం. పార్టీకి ద్రోహం చేసే ప్రశ్నేలేదు.

సీనియర్‌గా మీరు సూచించవచ్చుగా!
       ఇంకెక్కడి సీనియారిటీ. దాన్నే గుర్తిస్తే ఈ పాటికి రాజ్‌భవన్‌లో ఉండేవాడిని.

తెలంగాణపై పార్టీ నిర్ణయాన్ని వై.ఎస్‌ ప్రభావితం చేస్తున్నారా?
                 ఆయన సంగతెలా ఉన్నా.. పార్టీ నిర్ణయం తీసుకోవాల్సి ఉంది. చేయదల్చుకుంటే పార్టీ చేయగలదు. వైఎస్‌నెందుకు అంటారు? ఆయనకు అంత బలమే ఉంటే ఆయన సన్నిహితుడు కేవీపీ రామచంద్రరావుకు రాజ్యసభ సభ్యత్వం తెచ్చుకునేవాడు కదా! పాపం! రెండ్రోజుల్నుంచీ కేవీపీకి ఒకటే టెన్షన్‌. టిక్కెట్టు వస్తుందో రాదోనని! ఏం చెప్పమంటారు! నా హయాం(2002)లో ఆయనకు రావాల్సింది టి.సుబ్బరామిరెడ్డికి దక్కింది. నేను బాధపడ్డాను కూడా! వాస్తవానికి కేవీపీ నాకు చాలా ద్రోహం చేశారు. నాకు అప్రధానమైన దేవాదాయ శాఖ రావటానికి ఆయనే కారణం. నేను వైఎస్‌కు ఎంత చేశాను? రాష్ట్రంలో సీనియర్‌ కాంగ్రెస్‌ నేతలంతా ఆయన్ను వ్యతిరేకిస్తుంటే.. కాదని ఆయన్ను కాబోయే ముఖ్యమంత్రిగా నేనే ప్రకటించాను. కానీ ఇప్పుడు నాకు జరిగిందేమిటి? నాకు ద్రోహం చేసినప్పటికీ కేవీపీకి టిక్కెట్టు రావాలనే కోరుకుంటా. ఆయనకు ఎందుకింత అన్యాయం చేస్తున్నారో అర్థం కాదు. మూడు సార్లుగా ఆయనకు టిక్కెట్టు రావటం లేదు. ఆయన మహామంత్రి తిమ్మరుసు లాంటివాడు. తిమ్మరుసు కూడా అంతే. అందర్నీ చావగొట్టాడు. అయినా, నాకు ఆయనపై సానుభూతి ఉంది.

తెలంగాణపై పార్టీ ఏం చేయబోతోంది?
                  ఇప్పుడున్న బలం మళ్లీ తెచ్చుకోగలమా? అన్నదే పార్టీకున్న ఆలోచన. పార్టీ పరిస్థితి ఇప్పుడెలా ఉందంటే… కోడికంటే గుడ్డుతో సర్దుకుందామన్నట్టుగా ఉంది. ఎప్పుడో తినే కోడికూర కంటే ఇప్పుడున్న గుడ్డును తినేసి సరిపెట్టుకుందామన్న ఆలోచనతో నాయకత్వం ఉంది.

సోనియా పరిస్థితేంటి?
                   ఆమెకూడా తెలంగాణ విషయంలో ఏం చేయగలదు పాపం! ఓ విధంగా ఆమె బలహీనురాలు. కాంగ్రెస్‌ అధిష్ఠానం నెహ్రూ కాలంలా బలంగాలేదు. కాంగ్రెస్‌ బలహీనత కారణంగానే భాజపా పుంజుకుంటోంది. లేకుంటే రెండు సీట్లున్న భాజపా.. అధికారానికి రావటమేమిటి? కాంగ్రెస్‌ బలహీనంగా ఉన్నప్పటికీ పార్టీకి సోనియానే దిక్కు. రాజీవ్‌ తర్వాత పీవీ, కేసరిలువచ్చినా ఏమైంది? మళ్లీ ఆవిడ వస్తే కానీ పార్టీ పుంజుకోలేదు.

జిల్లాల్లో విజయవంతం
రాజధానిలో పాక్షికం
సచివాలయ ముట్టడికి యత్నం
అగ్రనేతల అరెస్టు
రాష్ట్రవ్యాప్తంగా 8వేల మంది అదుపులోకి

                భాజపా చేపట్టిన తెలంగాణ బంద్‌ స్వల్ప ఉద్రిక్త సంఘటనలు మినహా ప్రశాంతంగా ముగిసింది. తెలంగాణపై కాంగ్రెస్‌, సోనియాగాంధీల వైఖరిని నిరసిస్తూ.. సోనియా రాష్ట్ర పర్యటనకు వ్యతిరేకంగా భాజపా ఈ బంద్‌కు పిలుపునిచ్చింది. రాజధానిలో బంద్‌ ప్రభావం పాక్షికంగా కనిపించింది. కరీంనగర్‌, వరంగల్‌, నల్గొండ, మహబూబ్‌నగర్‌, ఆదిలాబాద్‌, నిజామాబాద్‌ తదితర జిల్లాలన్నింటిలోను బంద్‌ విజయవంతమైంది. హైదరాబాద్‌, వరంగల్‌ తదితర చోట్ల భాజపా కార్యకర్తలు బస్సు అద్దాలను పగలగొట్టారు. రాజధానిలో రాష్ట్ర మంత్రులు నలుగురిని భాజపా కార్యకర్తలు ఘోరావ్‌ చేశారు. సచివాలయంలోకి దూసుకెళ్లేందుకు ప్రయత్నించిన భాజపా రాష్ట్ర అధ్యక్షుడు దత్తాత్రేయ, లక్ష్మణ్‌ తదితరులను పోలీసులు ప్రతిఘటించారు. ఈ సందర్భంగా పోలీసులు మహిళలపై కూడా బలప్రయోగం చేశారు. బంద్‌ సందర్భంగా మొత్తం తెలంగాణ జిల్లాల్లో 8,385 మంది కార్యకర్తలను పోలీసులు అరెస్టు చేసి, అనంతరం వదిలేశారు. దత్తాత్రేయ, ఇంద్రసేనారెడ్డి, లక్ష్మణ్‌, చింతల రామచంద్రారెడ్డి, రాజేశ్వరరావు, ఝాన్సీరాణి, ప్రతాప్‌, సుగుణాకర్‌రావు, యాదగిరిరెడ్డి, నర్సింహారావు, బద్దం బాల్‌రెడ్డి, కళ్లెం బాల్‌రెడ్డి, కాసం వెంకటేశ్వర్లు తదితర నేతల్ని తెలంగాణ వ్యాప్తంగా వివిధ చోట్ల అరెస్టుచేశారు.

                ఉదయం నుంచే డిపోల్లో బంద్‌: బంద్‌ సందర్భంగా భాజపా కార్యకర్తలు బస్‌ డిపోల్లో ఆందోళనకు దిగి బస్సులను ఆపేశారు. హైదరాబాద్‌తోపాటు అన్నిజిల్లాల్లోనూ పార్టీశ్రేణులు జట్లుగా విడిపోయి బస్‌ డిపోలు, వ్యాపార సముదాయాలను మూసేయించే కార్యక్రమం చేపట్టారు. విద్యాసంస్థలు సెలవు ప్రకటించాయి. మరోవైపు దేవాదుల ప్రాజెక్టును ప్రారంభించేందుకు వచ్చే సోనియాకు.. నిరసన తెలిపేందుకు వెళ్లిన భాజపా నేతలను అరెస్టుచేసి ములుగు పోలీస్‌స్టేషన్‌కు తరలించారు.

         వేల సంఖ్యలో అరెస్టులు: బంద్‌ సందర్భంగా జిల్లాల్లో వేల సంఖ్యలో కార్యకర్తలను అరెస్టు చేశారు. ఒక్క వరంగల్‌లోనే 4,200 మంది, గ్రేటర్‌ హైదరాబాద్‌లో 2,460 మంది అరెస్టయ్యారు. నిజామాబాద్‌, ఆదిలాబాద్‌, నల్గొండ, మహబూబ్‌నగర్‌లలో కూడా వందల సంఖ్యలో కార్యకర్తలను అరెస్టు చేశారు. ఉస్మానియా, కేంద్ర విశ్వవిద్యాలయాల్లో సంపూర్ణంగా బంద్‌ జరిగింది. తెరాస ఈ బంద్‌కు దూరంగా ఉంది. తెలంగాణ ఐక్య కార్యాచరణ సమితి, తెలంగాణ రచయితల సంఘం, తెలంగాణ విద్యార్థి సంఘం, తెలంగాణ ప్రైవేటు కళాశాలల సంఘం, గెజిటెడ్‌ అధికారుల సంఘం తదితర సంఘాలు మద్దతు పలికి బంద్‌లో పాల్గొన్నాయి.

          సెంటిమెంటును చూపించారు…దత్తాత్రేయ: ప్రజలు సోనియాగాంధీ పర్యటనను అసలు పట్టించుకోలేదని, తెలంగాణ సెంటిమెంటును, ఆత్మాభిమానాన్ని ప్రదర్శిస్తూ బంద్‌ను విజయవంతం చేశారని దత్తాత్రేయ పేర్కొన్నారు. బంద్‌ అనంతరం పార్టీ నేతలు విద్యాసాగర్‌రావు, ఇంద్రసేనారెడ్డి, రామచంద్రరావులతో కలిసి ఆయన విలేకరులతో మాట్లాడారు. ప్రజల భావాల్ని అర్థం చేసుకుని సోనియా, వైఎస్‌లు ఇప్పటికైనా కళ్లు తెరవాలని ఉద్ఘాటించారు. జగ్గంపేట సభలాగే హైదరాబాద్‌లోనూ సభ పెట్టి ఉంటే సెంటిమెంట్‌ షాక్‌ను సోనియా స్వయంగా చూసి ఉండేవారని పేర్కొన్నారు.

               నగరంలో మిశ్రమ స్పందన: భాజపా చేపట్టిన తెలంగాణ బంద్‌కు నగరంలో మిశ్రమ స్పందన లభించింది. తెల్లవారుజామున 4 గంటలకే రోడ్లపైకి వచ్చిన భాజపా నాయకులు, కార్యకర్తలు పలు ఆర్టీసీ డిపోల్లో బస్సులు బయటికి రాకుండా అడ్డుకున్నారు. ఆందోళనకారులు 28 బస్సుల అద్దాలు పగలగొట్టగా… 60 వరకు బస్సుల టైర్లలో గాలి తీశారు. భాజపా నేత ఇంద్రసేనారెడ్డి ఆధ్వర్యంలో కార్యకర్తలు దిల్‌సుఖ్‌నగర్‌ బస్సు డిపో ముందు బైఠాయించారు. పలు కూడళ్లలో సోనియాగాంధీ దిష్టిబొమ్మలు దహనం చేశారు. వరంగల్‌లో బంద్‌ సంపూర్ణంగా జరిగింది. భాజపాతోపాటు, మావోయిస్టులు, జనశక్తి వేర్వేరుగా బంద్‌కు పిలుపునిచ్చాయి. వ్యాపార, వాణిజ్య, విద్యాసంస్థలు మూసివేశారు. వరంగల్‌, హన్మకొండ పరిధిలో అక్కడక్కడా ఆర్టీసీ బస్సు అద్దాలు పగలుగొట్టిన ఘటనలు మినహా అంతా ప్రశాంతంగా ముగిసింది. కరీంనగర్‌ జిల్లాలో బంద్‌ ప్రశాంతంగా జరిగింది. మధ్యాహ్నం వరకు ఆర్టీసీ బస్సులు నడవలేదు. మెదక్‌ జిల్లాలో బంద్‌ సంపూర్ణంగా జరిగింది. సిద్దిపేటలో ఆందోళనకారులు నాలుగు ఆర్టీసీ బస్సు అద్దాలను పగులగొట్టారు.

               కిషన్‌రెడ్డి ధర్నా.. అరెస్టు, విడుదల: తెలంగాణపై కాంగ్రెస్‌ వైఖరిని   నిరసిస్తూ భాజపా శాసనసభా పక్ష నేత జి.కిషన్‌రెడ్డి అసెంబ్లీ ఎదురుగా ఉన్న గన్‌పార్కులోని తెలంగాణ అమరవీరుల స్థూపం దగ్గర ధర్నాకు దిగారు. సమాచారం అందుకున్న పార్టీ నాయకులు, కార్యకర్తలు పెద్ద సంఖ్యలో అక్కడకు చేరుకుని జై తెలంగాణ.. జైజై తెలంగాణ నినాదాలతో హోరెత్తించారు. అక్కడికి చేరుకున్న పోలీసులు కిషన్‌రెడ్డిని అరెస్టు చేసి, అనంతరం విడుదల చేశారు.

కోమటిరెడ్డి వెంకటరెడ్డి

                      హైదరాబాద్‌, మార్చి 11 (ఆన్‌లైన్‌): తెలంగాణ రాష్ట్ర సమితి ప్రజాప్రతినిధులు రాజీనామా చేసిన లోక్‌సభ,శాసనసభ నియోజకవర్గాలకు జరిగే ఉప ఎన్నికల్లో మెజారీటీ సీట్లు కాంగ్రెస్‌ పార్టీ కైవసం చేసుకుంటుందన్న ఎమ్మెల్యే కోమటిరెడ్డి వెంకటరెడ్డి ధీమా వ్యక్తం చేశారు.శాసనసభా ప్రాంగణంలో మంగళవారం ఆయన విలేఖరులతో మాట్లాడారు.

                        ఈనెల 29న నల్గొండ జిల్లాలో భారీ బహిరంగ సభను నిర్వహించనున్నట్లు చెప్పారు. ఈ సభకు ముఖ్యమంత్రి వైఎస్‌ రాజశేఖరరెడ్డి ముఖ్యఅతిథిగా హాజరవుతారని వివరించారు. ఈ సందర్భంగా ఇందిరాగాంధీ విగ్రహాన్ని ఆవిష్కరిస్తారని చెప్పారు.

                      తెలంగాణ ఆత్మగౌరవ సభకు మించిన సమీకరణతో ఈ సభ జరుగుతుందన్నారు. 24న సీనియర్లు నిర్వహించే సభకు పార్టీకీ ఎలాంటి సంబంధం లేదన్నారు. అంతకుముందు సీఎల్పీ కార్యాలయంలో మంత్రి దామోదర్‌రెడ్డి మాట్లాడుతూ నిజమైన కాంగ్రెస్‌ కార్యకర్తలెవరూ ఈ సభకు హాజరు కాబోరని అన్నారు. సభపై అధిష్ఠానానికి ఫిర్యాదు చేస్తామని ఆయన చెప్పారు.

                    హైదరాబాద్‌, మార్చి 11 (ఆన్‌లైన్‌): “పార్టీలను మార్చే అలవాటున్న ఉప్పునూతల నేను రాజీనామా చేయాలంటూ సవాల్‌ చేయడం అర్థరహితం. నేనెందుకు రాజీనామా చేయాలి”- అని మంత్రి దామోదర్‌రెడ్డి అన్నారు. తెలంగాణ అంశాన్ని సోనియా చేతుల్లో పెట్టామని, ఆమె ఇవ్వచ్చు, ఇవ్వకపోవచ్చు, క్రమశిక్షణ కలిగిన కార్యకర్తలుగా ఏ నిర్ణయానికైనా కట్టుబడి ఉంటామని, రాజీనామాలు చేయబోమని స్పష్టం చేశారు. కాంగ్రెస్‌ శాసనసభాపక్ష కార్యాలయంలో మంగళవారం ఆయన విలేఖరులతో మాట్లాడారు.

                    ఉప్పునూతలను ఉద్దేశించి సహచర మంత్రి ముఖేష్‌గౌడ్‌ తల్లిపాలు తాగి రొమ్ముగుద్దినట్టు వ్యవహరించడం సముచితం కాదని సలహా ఇచ్చారని, దీంతో తనకు తెలంగాణతల్లి మాత్రమే తల్లి అని, కాంగ్రెస్‌ పార్టీ తల్లి కాదని ఉప్పునూతల వ్యాఖ్యానించడాన్ని తాను తప్పుపట్టానని వివరణ ఇచ్చారు. రాజకీయంగా ఎదుగుదలను, పదవులను ఇచ్చి గౌరవించిన కన్నతల్లి వంటి కాంగ్రెస్‌కు ద్రోహం చేయవద్దని కోరేందుకే ఉప్పునూతలను రాజీనామా చేసి ఉప ఎన్నికలకు సిద్ధం కావాలని కోరానని అన్నారు.

                    ఈ సందర్భంగా కాసు బ్రహ్మానందరెడ్డి హయాం నుంచి ఇప్పటివరకూ వివిధ ప్రభుత్వాల్లో ఉప్పునూతల వ్యవహారశైలిపై తీవ్రస్థాయిలో విమర్శలు గుప్పించారు. మంత్రిపదవి దక్కుతుందని ఆశ ఉన్నంతకాలం తెలంగాణ ప్రాంతంలో వైఎస్‌ అభివద్ధి కార్యక్రమాలు విస్తతంగా చేపడుతున్నారని పొగడడమే కాకుండా… బహిరంగసభల్లో ‘రాజశేఖరా.. నీపై మోజు తీరలేదురా’ అంటూ పాటలు పాడారని… ఇప్పుడు వైఎస్‌ దిగిపో అంటున్నారని ఆగ్రహం వ్యక్తం చేశారు. వైఎస్‌ను దిగిపో అని చెప్పడానికి ఉప్పునూతల ఎవరని ప్రశ్నించారు. ఈ సమావేశంలో శాసనసభ్యులు బాజిరెడ్డి గోవర్ధన్‌, కిష్టారెడ్డి, ఎమ్మెల్సీ రాజేశ్వరరావు తదితరులు పాల్గొన్నారు.

తలవంచేది లేదు పీఠమెక్కించిన గులాబీ కండువే కాలనాగై కాటేస్తుంది
అభినందన సభలో కాంగ్రెస్‌కు కేసీఆర్‌
హెచ్చరిక కాంగ్రెస్‌ను నిలదీయండి: జయశంకర్‌

                 హైదరాబాద్‌, మార్చి 11 (ఆన్‌లైన్‌): తెలంగాణ కోసం అవసరమైతే మెడలు కోసుకుంటామే తప్ప ఎలాంటి పరిస్థితుల్లోనూ తలవంచేది లేదని టీఆర్‌ఎస్‌ అధినేత కేసీఆర్‌ స్పష్టంచేశారు. కాంగ్రెస్‌ నేతలకు పదవులు, కిరీటాలు తెచ్చిపెట్టిన గులాబీ కండువాయే కాలనాగై కాటేస్తుందని హెచ్చరించారు. తెలంగాణ విషయంలో పూటకో మాట,పేటకో మాట మాట్లాడుతూ.. బద్మాష్‌ గిరీ చేస్తోన్న కాంగ్రెస్‌ నేతలు అంతకు అంత అనుభవిస్తారని ఆయన శపించారు. ఇటీవల సామూహిక రాజీనామాలు చేసిన టీఆర్‌ఎస్‌ నేతలకు మంగళవారం హైదరాబాద్‌లో తెలంగాణ సంఘాల ఆధ్వర్యంలో ఘన సన్మానం జరిగింది. ఈ కార్యక్రమానికి ముఖ్య అతిథిగా హాజరైన కేసీఆర్‌ కాంగ్రెస్‌పై ధ్వజమెత్తారు. “గజకర్ణ, గోకర్ణ, టక్కుటమార విద్యలతో ప్రజలను మోసం చేయాలని కాంగ్రెస్‌ నేతలు చూస్తున్నారు.

                    అధికారం మత్తులో, ముఖ్యమంత్రి జిత్తుల్లో ఇరుక్కుపోయిన తెలంగాణ కాంగ్రెస్‌ నేతలకు పౌరుషం లేకపోవచ్చు కానీ వాటిని చూస్తోన్న తెలంగాణ ప్రజలకు పౌరుషం చావలేదు. వచ్చే ఎన్నికల్లో తెలంగాణేతర పార్టీలను తరిమికొట్టేందుకు వారు సిద్ధమయ్యారు. జార్ఖండ్‌ తరహాలో వెంటపడి, వేటాడి తెలంగాణ సాధి స్తాం. అవసరమైతే మా ప్రాణాలను బలిపెడతాం. తెలంగాణ రాజకీయాధికారం సంపూర్ణంగా తెలంగాణవాదుల చేతుల్లోకి తీసుకుని.. వచ్చే ఎన్నికల్లో 115 అసెంబ్లీ, 17 పార్లమెంట్‌ స్థానాలు గెలుచుకుని అందరినీ సుందరయ్య భవన్‌లో కూర్చోబెడితే కేంద్ర, రాష్ట్ర ప్రభుత్వాలు నడుచుకుంటూ వచ్చి రాష్ట్రాన్ని ఇస్తాయి..” అని కేసీఆర్‌ పేర్కొన్నారు. అనంతరం ప్రముఖ పాత్రికేయుడు పొత్తూరి వెంకటేశ్వరరావు మాట్లాడుతూ.. దేశ చరిత్రలో ఒకే టర్మ్‌లో ఒకే ఎంపీ రెండు సార్లు రాజీనామా చేసిన సంఘటన లేదన్నా రు. “టీఆర్‌ఎస్‌ రాజీనామాల త్యాగం వృథా కాదు. తెలంగాణ రాష్ట్రం తప్పకుండా సిద్ధిస్తుంది” అని పేర్కొన్నారు. కాంగ్రెస్‌ నేతలు ఎన్నికల ముందు ఏం చెప్పారో, ఇపుడేం చేస్తున్నారో నిలదీయాలని టీఆర్‌ఎస్‌ సిద్ధాంతకర్త ప్రొఫెసర్‌ జయశంకర్‌ ప్రజలకు పిలుపునిచ్చారు.

                     తెలంగాణపై ఇతర పార్టీల వైఖరేమిటో ప్రశ్నించాలని కోరారు. టీడీపీ అంగీకారం ఇవ్వకుండా ఏకాభిప్రాయం ఎలా కుదురుతుందని వీరప్పమొయిలీ ప్రశ్నించడం విడ్డూరంగా ఉందన్నారు. “తెలంగాణ మంత్రులు అవమానాలు, చీదరింపులు భరించి ద్వితీయశ్రేణి నేతలు గా బతకడానికి సిద్ధపడినా.. తెలంగాణ ప్రజలు ప్రథమ శ్రేణి పౌరులుగా బతకాలనుకుంటున్నారు” అని జయశంకర్‌ పేర్కొన్నారు. ప్రొఫెసర్‌ కోదండరామ్‌ అధ్యక్షతన జరిగిన ఈ సభలో టీఎన్‌జీవో సంఘం ప్రధాన కార్యదర్శి కే.స్వామిగౌడ్‌, సీనియర్‌ జర్నలిస్టు మల్లేపల్లి లక్ష్మ య్య, టీఎన్‌జీవో సంఘం అధ్యక్షుడు వి.శ్రీనివాస్‌గౌడ్‌, ఉద్యోగుల సంఘం నేత సి.విఠల్‌, రచయితల వేదిక నేతలు జూకంటి జగన్నాథం, శ్రీధర్‌రావు దేశ్‌పాండే ప్రసంగించారు.

మెడలు కోసుకుంటాం
రాజీలేని పోరు చేస్తాం
తెలంగాణ ఇస్తరో, ఇయ్యరో సీదా చెప్పుండ్రి
కాంగ్రెస్‌ నేతలకు కేసీఆర్‌ సవాల్‌
హైదరాబాద్‌ – న్యూస్‌టుడే

”ప్రత్యేక తెలంగాణ రాష్ట్రం దిశగా అంతిమపోరాటం ఆసన్నమైంది. ప్రజలు, విద్యావంతులు, ఉద్యోగుల దీవెనలు మాకున్నాయి. తెలంగాణ కోసం ప్రజాస్వామ్య పద్ధతుల్లో రాజీలేని పోరాటం చేస్తున్నం. ఇందుకోసం మెడలు కోసుకుంటాం తప్ప మెడలు వంచం.

        ప్రాణాలర్పించేందుకూ సిద్ధంగా ఉన్నాం. తెలంగాణ ప్రాంత ప్రజలు స్వేచ్ఛగా జీవించాలంటే రాజకీయ అధికారం కావాలి. అధికారం ఆంధ్రా ప్రాంతం వారికిచ్చి దరఖాస్తులు పట్టుకుని యాచించుడు వద్దు. మనమే శాసించాలి.. డిమాండ్‌ చేయాలి. ఇప్పటికే కాంగ్రెస్‌ పార్టీలో వణుకు పుట్టింది. వచ్చే ఎన్నికల్లో 119మంది ఎన్నికల్లో గెలిస్తే సుందరయ్య విజ్ఞానకేంద్రానికి వచ్చి కాళ్లుమొక్కి తెలంగాణను అప్పగిస్తరు. ఇప్పటి నుంచి తెలంగాణ సాధన కోసం గల్లీ గల్లీకి వెళతాం. ప్రతి గుండె తలుపును తడతాం” అని తెరాస అధినేత కేసీఆర్‌ పేర్కొన్నారు.

సుందరయ్య కళానిలయంలో తెలంగాణ విద్యావంతుల వేదిక ఆధ్వర్యంలో మంగళవారం జరిగిన సంఘీభావ సభలో కేసీఆర్‌ ముఖ్య అతిథిగా పాల్గొన్నారు. 2004 ఎన్నికల్లో తెలంగాణ ఇస్తామని మోసం చేసిన కాంగ్రెస్‌ పార్టీ దగాకోరుతనాన్ని బయటపెట్టేందుకే చట్టసభలకురాజీనామా చేశామని ఆయన తెలిపారు. ఎన్నికల ముందు కాంగ్రెస్‌ నేతలు వేసుకున్న గులాబి కండువా వారి మెడల్లో నాగుపాముగా మారిందని చెప్పారు. నిజానికి కాంగ్రెస్‌తో పొత్తు తనకేమాత్రం ఇష్టం లేదన్నారు. పరిగి, నల్గొండ, వనపర్తిలలో జరిగిన బహిరంగ సభల్లో కాంగ్రెస్‌ నాయకులు ‘తెలంగాణ రాష్ట్రం కావాలంటే కేసీఆర్‌ మాతో పొత్తు పెట్టుకోవాలి… లేదంటే ఆయన్ను చంద్రబాబు ఏజెంట్‌గా పరిగణిస్తాం అని అన్నారు. దీంతో పార్టీ నాయకులు, ప్రజల నుంచి వచ్చిన విపరీత ఒత్తిడి కారణంగా పొత్తు కుదుర్చుకున్నాం. కాంగ్రెస్‌పై నమ్మకం లేకపోయినా అప్పటికి తప్పని పరిస్థితుల్లో ఒప్పుకున్నాం. ఏరుదాటక తెప్పతగలేసిన చందంగా మోసం చేశారు. తెలంగాణ రాష్ట్రం ఇవ్వడం వారికి ఇష్టం లేనందునే అష్టవంకరులు తిప్పుతున్నారు. ఒక్కో నాయకుడు ఒక్కో మాట మాట్లాడుతున్నాడు’ అని విమర్శించారు.”అరె… తెలంగాణ ఇస్తరా? ఇయ్యరా? సీదా చెప్పుండ్రి… మా తొవ్వ మేం చూసుకుంటం” అంటూ సవాల్‌ విసిరారు.

కాంగ్రెస్‌ నేతలూ… మాటలొచ్చిన చిలుకలా చస్తారు: తెలంగాణ రాష్ట్రంపై ప్రేమ ఉన్నా అధికారం మత్తులో రాజశేఖర్‌రెడ్డిజిత్తులతో కూరుకుపోయిన కాంగ్రెస్‌ నేతలు మాటలొచ్చినా సమయానికి మాట్లాడలేక చనిపోయిన చిలుకమల్లే చస్తారని కేసీఆర్‌ హెచ్చరించారు. సామాజిక, ఆర్థిక, రాజకీయ దివాలకోరుతనంతో కొందరు కాంగ్రెస్‌ నేతలు అధికారంలో ఉన్నవారికి మడుగులొత్తుతున్నారని ఆరోపించారు.

పరాభవం తప్పదు: మొల్ల చేతిలో పరాభవం పొందిన తెనాలి రామలింగడిలా కాంగ్రెస్‌ పార్టీకి తెలంగాణ ప్రజల నుంచి అవమానం తప్పదని కేసీఆర్‌ అన్నారు. కవయిత్రి మొల్లను ఓడించేందుకు వెళ్లిన తెనాలి రామలింగడు పరిచారికను ‘దరిద్రపు దానా సున్నం తీసుకురా… అంటూ ఆశువుగా పద్యం చెప్తాడు. అందుకామె లోపలికి వెళ్లి కుక్కా సున్నం తీసుకో అంటూ పద్యం ద్వారానే దీటుగా సమాధానం చెప్తుంది. ఇది పిట్టకత కాదు… నిజంగా జరిగింది. పరిచారికలా తెలంగాణ ప్రజలు కాంగ్రెస్‌కు బుద్ధిచెపుతారు’ అంటూ సభికులను నవ్వించారు.

కీర్తి సంపాదించుకుంటారా? లేదా?.. జయశంకర్‌: రాష్ట్రాన్ని ఇచ్చి కీర్తి సంపాదించుకుంటారో అడ్డుకాలు వేసి అపకీర్తిని మూటగట్టుకుంటారో కాంగ్రెస్‌ తేల్చుకోవాలని తెరాస సిద్ధాంతకర్త జయశంకర్‌ ప్రశ్నించారు. వాస్తవాలు పరిగణించకుండా కాంగ్రెస్‌ నేతలకు అవాకులు చెవాకులు పేలుతున్నారని విమర్శించారు. తెలంగాణ ప్రాంతాన్ని అభివృద్ధి చేస్తున్నామన్న ముఖ్యమంత్రి వైఎస్‌.. గోదావరి, కృష్ణా జలాల్లో ఎన్ని నీళ్లు ఈ ప్రాంతానికి ఇచ్చారో సమాధానం చెప్పాలని డిమాండ్‌ చేశారు. మరోమారు వైఎస్‌ ముఖ్యమంత్రి ఐతే తెలంగాణ ప్రాంతాన్ని అణిచేస్తారని, రెండో శ్రేణి ప్రజలుగా మనం జీవించాల్సి వస్తుందని పేర్కొన్నారు.

ప్రొఫెసర్‌ కోదండరామ్‌ అధ్యక్షత వహించిన ఈ సమావేశంలో రాజీనామా చేసిన తెరాస ఎంపీలు మధుసూదన్‌ రెడ్డి, వినోద్‌కుమార్‌, రవీంద్ర నాయక్‌, ఎమ్మెల్యేలు నాయిని నర్సింహారెడ్డి, పద్మారావు, కెప్టెన్‌ లక్ష్మీకాంతరావు, డాక్టర్‌ విజయరామారావు, డాక్టర్‌ నగేష్‌, సోలిపేట రామలింగారెడ్డి, ఎ.రవీందర్‌ రెడ్డి, డాక్టర్‌ చంద్రశేఖర్‌, గోవింద నాయక్‌, ఎమ్మెల్సీలు కె.దిలీప్‌కుమార్‌, హెచ్‌.ఎ.రహమాన్‌, తెలంగాణ విద్యావంతుల వేదిక ప్రతినిధులు తదితరులు హాజరయ్యారు.

కలిసుందాం రండి…

కాంగ్రెస్‌ గెలుపుతోనే మన మనుగడ

తెలంగాణ ఎంపీలకు వైఎస్‌ పిలుపు
జైపాల్‌రెడ్డి విందులో ఉల్లాసంగా ముఖ్యమంత్రి
తెలంగాణకే కట్టుబడ్డా: కాకా
ఆంధ్రనేతలు మాటలాపాలి: వీహెచ్‌
న్యూఢిల్లీ – న్యూస్‌టుడే
మధుయాష్కీతో ఆలింగనం…
కాకాతో ఆత్మీయ కరచాలనం…
జైపాల్‌రెడ్డి, వీహెచ్‌లతో ప్రేమపూర్వక పలకరింపులు…
ఇతర కాంగ్రెస్‌ ఎంపీలతో సరదా సరదా కబుర్లు…
అంతా ఒక్కటిగా ఉందామని సున్నిత సందేశం…

ఇవన్నీ చేసింది ఎవరో కాదు… ముఖ్యమంత్రి వై.ఎస్‌.రాజశేఖరరెడ్డే. ముఖ్యమంత్రి కొత్త తీరు చూసి ఎంపీలు అంతా సంభ్రమాశ్చర్యాలకు గురయ్యారు. ముఖ్యంగా తెలంగాణ ఎంపీలయితే ఈ నిజాన్ని కొద్దిసేపు నమ్మలేకపోయారు. వివిధ అంశాలపై తనను విమర్శించే వారితో కూడా వైఎస్‌ ఇంత చనువుగా వ్యవహరించారేమిటా అనుకున్నారు. ఈ సన్నివేశం చోటు చేసుకుంది ఢిల్లీలో అయితే… ఆంధ్రప్రదేశ్‌ ఎంపీలకు కేంద్ర పట్టణాభివృద్ధి శాఖ మంత్రి ఎస్‌.జైపాల్‌రెడ్డి తన నివాసంలో ఇచ్చిన విందు కార్యక్రమం దీనికి వేదికయ్యింది. ఏటా రాష్ట్రానికి చెందిన ఎంపీలకు జైపాల్‌రెడ్డి విందు ఇవ్వడం గత నాలుగేళ్లుగా ఆనవాయితీగా వస్తోంది. మంగళవారం ఇచ్చిన మధ్యాహ్నవిందుకు.. ఢిల్లీలోనే ఉన్న వైఎస్‌ ముఖ్య అతిథిగా హాజరయ్యారు. ఈ సందర్భంగా ముఖ్యమంత్రి తెలంగాణ ప్రాంత ఎంపీల చేతుల్ని తన చేతుల్లోకి తీసుకుని… ‘కాంగ్రెస్‌ పార్టీ విజయాలు సాధిస్తూ దేదీప్యమానంగా ఉంటేనే మనమంతా మనగులుతాం. వచ్చే అన్ని ఎన్నికల్లో కాంగ్రెస్‌ గెలుపొందడానికి మీ అందరి సహకారం కావాలి. కలిసి పోరాడదాం’ అని అన్నారు. విందులో సహజంగానే ‘తెలంగాణ’ అంశం ప్రస్తావనకు వచ్చింది. జైపాల్‌రెడ్డి, వెంకటస్వామి, వీహెచ్‌, దాసరి నారాయణరావు, కె.కేశవరావు, జి.ఎస్‌.రావు(పీసీసీ అధ్యక్షుడు), రేణుకాచౌదరి, వి.బాలశౌరి, సురవరం సుధాకరరెడ్డి (సీపీఐ), టి.సుబ్బరామిరెడ్డిలు ముఖ్యమంత్రి కూర్చున్న రౌండ్‌ టేబుల్‌ చుట్టూ కూర్చున్నారు. మిగతా ఎంపీలు మధ్య మధ్యలో అక్కడికి వస్తూ పోతూ ఉన్నారు.

ముందుగా ముఖ్యమంత్రి…’రాష్ట్రానికి నేను చేసినంత అభివృద్ధి మరే ముఖ్యమంత్రయినా చేశారా?’ అని బాలశౌరిని ప్రశ్నించి చర్చకు నాంది పలికారు. అభివృద్ధికి సలహాలు ఇవ్వాలని, కొత్త ఆలోచనలు పంచుకోవాలని కూడా జైపాల్‌రెడ్డి, ఇతరులను వైఎస్‌ కోరారు. ఈ సందర్భంగా వీహెచ్‌ జోక్యం చేసుకుని వచ్చే ఉప ఎన్నికల గురించి మాట్లాడదాం అన్నారు. ‘తెలంగాణలో ఉప ఎన్నికలకు మంత్రులను ఇన్‌ఛార్జులుగా నియమించే ముందు మమ్మల్ని ఎందుకు సంప్రదించలేదు’ అని వీహెచ్‌ ప్రశ్నించారు. బదులుగా ముఖ్యమంత్రి… ప్రస్తుతం మీ అందరి సలహాలు, ఆలోచనలు చెప్పాలనే కోరుతున్నానని అన్నారు. తెలంగాణకు సంబంధించి నా చేతిలో ఏమీలేదని, అంతా అధిష్ఠానం చేతిలోనే ఉందని పునరుద్ఘాటించారు. ‘వ్యక్తిగతంగా ఎంపీలు గానీ, నాయకులు గానీ వారి ఇష్టం వచ్చినట్లు తెలంగాణపై మాట్లాడవద్దు. అది పార్టీ ప్రయోజనాలను దెబ్బతీస్తుంది’ అని వైఎస్‌ హితవు పలికారు.

వెంకటస్వామి మాట్లాడుతూ… సోనియాగాంధీ అపాయింట్‌మెంట్‌ కోసం ఐదురోజులు ఎదురు చూడటం తనను ఎంతగానో బాధించిందన్నారు. ఫలితం దక్కకుండానే వెనక్కి తిరిగిరావాల్సి వచ్చిందని చెప్పారు. ‘ఏ సమయంలోనైనా జవహర్‌లాల్‌ నెహ్రూ, ఇందిరాగాంధీలను కలుసుకునే వాడిని. అలాంటిది నా కూతురు వయసున్న సోనియా నాకు అపాయింట్‌మెంట్‌ తిరస్కరించడం బాధ కలిగించింది’ అని వివరించారు. తానే అడ్డుకున్నట్టు అప్పట్లో వార్తలు వచ్చాయని, అయితే అపాయింట్‌మెంట్‌ దొరక్కపోవడానికి తాను బాధ్యుణ్ని కాదని కాకా చేతులు పట్టుకుని ముఖ్యమంత్రి చెప్పినట్టు తెలిసింది. బహుశా అనారోగ్యం కారణంగా ఆమె అపాయింట్‌మెంట్‌ ఇవ్వకపోయుంటారని అన్నారు. అనంతరం చర్చ మళ్లీ తెలంగాణపై కొనసాగింది. తాను తెలంగాణకు కట్టుబడి ఉన్నానని వెంకటస్వామి విస్పష్టంగా చెప్పారు. ప్రత్యేక తెలంగాణను ప్రకటిస్తే… తెలంగాణ ప్రాంతంలోని అన్ని సీట్లూ కాంగ్రెస్‌ కైవశం చేసుకుంటుందన్నారు. కొందరు ఎంపీలు జోక్యం చేసుకుని… ‘ఇదివరకు మీరు ముఖ్యమంత్రిని పొగడ్తలతో ముంచెత్తారు. ఇప్పుడు మీ వైఖరిని మార్చుకున్నారేమిటి’ అని ప్రశ్నించారు. చేవెళ్ల ప్రాజెక్టు, ఇతర అభివృద్ధి అంశాలపై వైఎస్‌ను కొనియాడానని, ఇప్పటికీ ఆయనపై వ్యతిరేకత ఏమీ లేదన్నారు. ఈ వయసులో… తెలంగాణ విషయంలో మాత్రం వెనక్కి తగ్గేదేలేదని కాకా స్పష్టం చేశారు.

ఇదే సమయంలో రాయపాటి సాంబశివరావు ఏదో అనడంతో వీహెచ్‌ తీవ్రంగా స్పందించారు. ‘41 మంది కాంగ్రెస్‌ ఎమ్మెల్యేలు తెలంగాణ అంశంపై ఢిల్లీకి వచ్చినప్పుడే ఆంధ్రా నాయకులు అభ్యంతరం చెప్పాల్సింది. ఇప్పుడు వ్యవహారం చాలా దూరం వెళ్లింది. ఆంధ్రా నాయకులు తెలంగాణపై అసంబద్ధంగా మాట్లాడుతున్నారు. ఆ మాటలే తెలంగాణపై ఒత్తిడి, సానుభూతి పెంచుతున్నాయి. ముందు ఆంధ్రా నేతలు తెలంగాణపై మాట్లాడటం ఆపేయాలి’ అని వీహెచ్‌ అన్నారు. ఇంతలో రేణుకాచౌదరి కల్పించుకుని… ఇంతవరకు పార్టీ జెండా పట్టనివారు కూడా తెలంగాణపై మాట్లాడుతున్నారని ఆమె మధుయాష్కీని ఉద్దేశించి పరోక్షంగా వ్యాఖ్యానించారు. ‘కాకా, హనుమంతరావులు మాట్లాడారంటే అర్థం ఉంది. పార్టీ జెండాను భుజనా మోసిన కార్యకర్తలకు మనం ఎంతో రుణపడి ఉండాలి. కాంగ్రెస్‌ను సమాధి చేయొద్దు. సీనియర్‌ నేతలు కూడా రెచ్చగొట్టే వ్యాఖ్యలతో సందిగ్థత సృష్టించకూడదు’ అని విజ్ఞప్తి చేశారు.

విందు చర్చల్లో జైపాల్‌రెడ్డి దాదాపు మౌనంగానే ఉండిపోయారు. విందు తర్వాత ఆయనే ఈ విషయాన్ని విలేకరులకు చెప్పారు. తెలంగాణపై తన అభిప్రాయాన్ని బహిరంగంగా ప్రకటించనని, పార్టీ అధ్యక్షురాలు సోనియాగాంధీ, ప్రధాని మన్మోహన్‌సింగ్‌లకు మాత్రమే చెబుతానని అన్నారు.